Pavysam naseņ izdūts audio īrokstu disks „Latgalīšu puosokys i puorsokys”. Kam ir interese tū var ari īsaguoduot latgalīšu interneta veikalā madeinlatgola.lv. Itymā puosoku saisteibā i atbylstūši tagadejai politiskajai gaisūtnei vysapleik maņ ir vīna puorsoka par vucynu boru, kas nazkū gaideja... Pasavērsim iz situaceji vaļstī drusku prostuok.

Situaceja: vucynu bors, pīci goni, daži suni i vylku bareņš

•Vycynu bors. Gonās kur kurais, vysu laiku duovās i lomojās iz gonim, vylkim i sunim, kai ari vīns iz ūtra, ka nav kuorteibys. Laiku pa laikam sazalosa kūpeigai lyugšonai i tic, ka atīs kaids nu molys i savess kuorteibā jūs dzeivis. Juoatzeimej, ka vucyni bīži viņ poši nav pi tuo vaineigi, ka namuok atškirt vylku nu suņa, gudru gonu nu glupa. Regulari kaids aktivuoks vucynsaizbāg prūjom iz lobuokom ganeibom.

• Pīci goni (eistineibā īcalti nu vucynu bora) vysmoz treis nu jim struodoj vylku lobā, deļ tuo teik pabaruoti nu jūs laupejuma pabyrom, visi publiskai sovā vydā sporejās (pa leluokai daļai tik deļ tuo, kab attaisnuotu vylku zīduojumus i sajauktu sunim i vucynim golvys), reizi četrūs godūs meža molā spielej teatri, taisa šovus, leimej plakatus iz prīdes, dzyrda vucynus vysmoz ar iudini... Tys vyss, kab otkon tyktu par gonim iz nuokamajim četrim godim.

• Klusī suni, kas raudzejuši kod na kod sadzeit vucynus kuorteibā, paleidzēt sakareigajim gonim, pi īspiejis ikūst nagūdeigajim gonim i padzeit kaidu vylku, bet tys saucās „vīns navar nikuo padareit”, deļ tuo atmatuši cereibys. Kaids napīkuopeigs jau pa klusū sarausteits gobolūs pūra molā. Vēļ slyktuok, kod dažs jau sasadorboj ar vylkim i breižim vairs navar saprast – kurš eists suņs, a kurais nu meža izleids.

• Vylki dažaidu veidu. Leluokī sēd mežā i iz pļovu praktiski nazaruoda, kod na kod sazateik ar „sovejim” gonim. Dažim vylkim suok palikt garlaiceigi, tod tī valk vucyna uodu, kliust par īryndys „vucinim” voi attīceigi „gonim”. Voi ari, kod vucynu bors palīkn par daudz navoldams, tāloj gūdeigus suņus...

Rezuļtats: vucynu skaits naizbāgami sasamazynoj i palīkn gryutuok konkurēt ar kaimiņu gonampulkim, kas pakuopeniski puorjem lobuokuos ganeibys... Kas vaineigs? Vylki? Suni? Goni? Augstuoki pāki? Voi vysleidz mes poši – vucyni?